Pagkakaisa

Habang nakapila sa Immigration sa loob ng NAIA pagdating ko dito sa Pilipinas, bigla kong naalala ang binayarang kong terminal fee na Php 750.00 Maraming mga ideya ang naglaro sa aking isipan. Malaking halaga ito para sa karamihan ng mamamayan ng ating bansa. Para sa kumikita ng minimum wage, ito ay kanilang pinagtatrabauhan ng kulang dalawang araw. Maaring maliit lamang sa mga pasahero ng eroplano na nakakabili na libu-libong tiket para sa pasahe. Saan ba napupunta itong perang ibinabayad ng mga pasahero. Para sa maintenance fee ng mga makinang hindi pa napapalitan sa mahabang panahon? Para sa mga empleyado na pagkakung minsan ay humihingi ng tip, nakasandal sa pader habang naghihintay, at mga empleyado na di man lang mahawakan ng maayos ang kanilang plakard? Sulit ba ang Php750.00 na binabayaran sa ilang oras na pamamalagi mo sa loob ng paliparan? Kung tutuusin, responsibilidad ng gobyerno ang pagpapatakbo sa mga ganitong paliparan. Wala naman akong reklamo sa pagbabayad ng terminal fee, ito ay bilang tulong na rin sa ating bayan. Kung ito nga ay talagang nakakatulong.

Hindi ko naman sinisisi ang gobyerno. Alam naman nating lahat na maraming mga krisis ang ating pinagdadaanan sa kasalukuyan, at maraming intindihin ang gobyerno. Hindi tayo nag-iisa, kahit ang mga mauunlad na mga bansa ay nagkakaroon din ng suliranin kung minsan. Nagkakaiba nga lang sa paglutas ng mga ito.

Sa Pilipinas, suwerte na ang ibang pamilya kung sila ay makakakain tatlong beses isang araw. Pinoproblema ang pambaon ng mga anak, pambili ng pagkain, at kung saan kukuhanin ang perang gagamitin. Maraming pang ibang suliranin ang kinakaharap ng ating mamamayan. Marami, na hindi na natin magawang isipin ang pangkalahatang problema ng lipunan. Hindi nabibigyan ng malaking pagpapahalaga ang mga problema o isyu ng karamihan, dahil sa personal na isyu pa lang, ang iba ay problemadong problemado na. Mabibigyan lamang ng pagpapahalaga ang isyung panglipunan kung ito ay makakaapekto sa mga tao ng direkta. (hal. pagtaas na presyo na mga bilihin)

Marahil isa ito sa mga dahilan kung bakit ang ilang suliranin ay hindi natin masolusyunan. Hindi kasi nagkakaisa ang mga mamayan. Tulad ng nabanggit ng ilan, hindi lamang sa eleksyon natatapos ang responsibilidad at obligasyon ng mga mamamayan. Sa huli, hindi nating maisisisi lubos sa isang tao o institusyon ang kasalanan. Lahat tayo ay may parte sa kasalanang ito